Landsmót UMFÍ 50+

Þátttökugjald er 6.000 krónur og fyrir það er hægt að taka þátt í öllum greinum mótsins. Þegar greiðslu á þátttökugjaldi er lokið er hægt að skrá sig í einstakar keppnisgreinar. Ekki þarf að skrá sig sérstaklega til þess að taka þátt í opnum greinum, bara mæta og skemmta sér með fjölskyldu og vinum! 

Greitt er sérstaklega fyrir miða á matar- og skemmtikvöld sem fram fer laugardagskvöldið 26. júní. Matar- og skemmtikvöldið hefur verið afar vinsælt og færri komist að en vilja. Það er því um að gera að kaupa miða um leið og þátttaka á mótið er staðfest. Miðaverð á matar- og skemmtikvöld er 6.400 kr. 

Skráning á Landsmót UMFÍ 50+ fer fram í gegnum Abler. Þegar smellt er á skráningarhlekkinn færist þú yfir á vefsíðu Abler.

Ef þú hefur ekki áður notað Abler þarf fyrst að stofna notanda. Að því loknu velur þú það íþróttahérað sem þú tilheyrir og greiðir þátttökugjald sem er 6.000 kr.

Þegar greiðslu þátttökugjalds er lokið færð þú sendan tölvupóst með hlekk þar sem gengið er frá skráningu í greinar mótsins.

Listi yfir landshluta og íþróttahéruð

Höfuðborgarsvæðið

• ÍBR – Íþróttabandalag Reykjavíkur
• ÍBH – Íþróttabandalag Hafnarfjarðar
• UMSK – Ungmennasamband Kjalarnesþings
• V – Ungmennafélagið Vesturhlíð (félag með beina aðild)

Vesturland

• HSH – Héraðssamband Snæfellsness og Hnappadalssýslu
• ÍA – Íþróttabandalag Akraness
• UDN – Ungmennasamband Dalamanna og Norður-Breiðfirðinga
• UMSB – Ungmennasamband Borgarfjarðar

Vestfirðir

• HSS – Héraðssamband Strandamanna
• HHF – Héraðssambandið Hrafnaflóki
• HSB – Héraðssamband Bolungarvíkur
• HSV – Héraðssamband Vestfirðinga

Norðurland vestra

• UMSS – Ungmennasamband Skagafjarðar
• USAH – Ungmennasamband Austur-Húnvetninga
• USVH – Ungmennasamband Vestur-Húnvetninga

Norðurland eystra

• HSÞ – Héraðssamband Þingeyinga
• ÍBA – Íþróttabandalag Akureyrar
• UÍF – Ungmanna- og Íþróttasamband Fjallabyggðar
• UMSE – Ungmennasamband Eyjafjarðar

Austurland

• UÍA – Ungmenna- og Íþróttasamband Austurlands
• USÚ – Ungmennasambandið Úlfljótur

Suðurland

• HSK – Héraðssambandið Skarphéðinn
• USVS – Ungmennasamband Vestur-Skaftafellssýslu
• ÍBV – Íþróttabandalag Vestmannaeyja

Suðurnes

• ÍRB – Íþróttabandalag Reykjanesbæjar
• ÍS – Íþróttabandalag Suðurnesja

Ef þú lendir í vandræðum við skráningu eða ert að skrá hóp til leiks er velkomið að senda tölvupóst á netfangið umfi@umfi.is.

Athygli er vakin á því að UMFÍ nýtir netföng sem skráð eru við skráningu til þess að koma á framfæri upplýsingum um viðburðinn. Með skráningunni gefa þátttakendur heimild fyrir því að nýta þær myndir og myndbönd sem kunna að vera teknar á viðburðinum og nýta þær í útgáfustarfsemi UMFÍ á hvaða formi sem það kann að vera. Með skráningu gefa þátttakendur jafnframt leyfi til þess að nöfn þeirra séu birt á heimasíðu UMFÍ vegna birtingu ráslista og úrslita. 

Athugið að UMFÍ tryggir ekki einstaklinga á viðburðum. 

Mótið verður haldið dagana 25.–27. júní 2027 á Hellu. Mótið er í samstarfi við Héraðssambandið Skarphéðin (HSK) og sveitarfélagið Rangárþing ytra.

Hella stendur á bökkum Ytri-Rangár í hjarta Suðurlands, umkringd víðáttumiklu landslagi þar sem náttúra og búskapur fara saman. Yfir sveitinni gnæfir Hekla og setur svip á svæðið. Á svæðinu eru fjölbreyttar göngu- og hjólaleiðir, hlaupaleiðir meðfram ánni og fjallgöngur fyrir þá sem vilja meira krefjandi útivist.

Á Hellu er notalegur þéttbýliskjarni með fjölskylduvænni sundlaug, íþróttasvæði og tjaldsvæði. Þar ríkir hlýlegt andrúmsloft og góð aðstaða fyrir gesti mótsins. Á svæðinu má njóta veitinga úr héraði, heimsækja handverksfólk, fara í skoðunarferðir, golf, hestamennsku eða njóta kyrrðar og náttúrufegurðar.

Aðeins um klukkustundar akstur er á Hellu frá höfuðborgarsvæðinu og um 20 mínútur frá Selfossi.

Upplýsingar um gistingu, afþreyingu og ferðatengda þjónustu má finna á vefsvæði Rangárþings ytra.

Rangárþing ytra býður þátttakendur Landsmóts UMFÍ 50+ velkomna í lifandi byggð þar sem hreyfing, samvera og náttúra mynda einstaka umgjörð fyrir mótið í sumar.

Mótið hefst á föstudagsmorgni og lýkur um miðjan dag á sunnudegi. Keppnisgreinar fara fram alla dagana og því er ómögulegt að taka þátt í þeim öllum. Markmiðið er að velja nokkrar greinar og prófa eitthvað nýtt.

Keppendur sækja mótsgögn í mótsstjórn við komu. Nánari upplýsingar um opnunartíma og staðsetningu koma fram í dagskrá.

Í mótsstjórn fá keppendur m.a. armband sem veitir viðkomandi heimild til keppni á mótinu og skal bera það allan tímann. Ef armband slitnar er alltaf hægt að fá nýtt.

Á mótinu verður keppt í 22 greinum fyrir 50 ára og eldri. Greinarnar sem í boði eru: boccia, borðtennis, bridds, dráttarvélaakstur, frjálsar íþróttir, golf, gróðursetning, göngufótbolti, götuhlaup (opin grein), hestadómar, mótorkross (opin grein), pílukast, plöntugreining (jurtagreining), pokavarp, pútt, pönnukökubakstur, ringó, skák, skotfimi, stafsetning, stígvélakast og sund.

Mótsgestir sjá sjálfir um sína gistingu á mótinu.

Upplýsingar koma innan tíðar. 

Veitingasala verður á flestum keppnissvæðum alla mótsdagana með léttum veitingum, kaffi og drykkjum.

Framkvæmdastjóri mótsins er Ómar Bragi Stefánsson. Netfang omar@umfi.is. Sími 898 1095.