Tæpir 1,7 milljarðar til íþrótta- og æskulýðsstarfs á árinu
Heildarútgjöld samkvæmt fjárlögum til íþrótta- og æskulýðsstarfs á þessu ári nema tæpum 1.686 milljónum króna (tæpum 1,7 milljörðum króna). Hlutfall framlaga af heildarútgjöldum ríkissjóðs nema 0,205%. Ef fjárframlög til uppbyggingar þjóðarhallar eru undanskilin nemur hlutfall framlaga á fjárlögum til íþrótta- og æskulýðsmála um 0,131% af heildarútgjöldum.
Samkvæmt fjárlögum fyrir árið 2026 nemur heildarfjárheimild til íþrótta- og æskulýðsmála 3.445,4 milljónum króna. Þar af eru 1.238 milljónir króna ætlaðar til uppbyggingar þjóðarhallar.
Þetta kemur fram í svari Ingu Sæland, mennta- og barnamálaráðherra, við fyrirspurn Huldu Bjarnadóttur, varaþingmanns Sjálfstæðisflokksins, um fjárframlög og ívilnanir til íþrótta- og æskulýðsstarfs og lýðheilsuverkefna.
Tekið er fram í svari ráðherra að sveitarfélög landsins veita umtalsverðum fjármunum ár hvert til íþrótta- og æskulýðsstarfs, meðal annars til uppbyggingar og rekstrar mannvirkja um land allt, sem ekki koma fram í fyrrnefndum tölum.
Skattaafslættir og ívilnanir
Hulda spurði jafnfram um það hvaða skattaafslættir og – eða – ívilnanir standi íþróttafélögum til boða. Mennta- og barnamálaráðuneytinu er samkvæmt svarinu kunnugt um að í gildi eru skattalegir hvatar fyrir lögaðila sem starfa til almannaheilla, svo sem íþróttafélög. Bent er á í svarinu að hvatarnir veiti félögum sem heyri undir skilgreininguna heimild til að draga frá skattskyldum tekjum gjafir og framlög til lögaðila sem uppfylla tiltekin skilyrði og eru skráðir á almannaheillaskrá sem Skatturinn heldur. Íþrótta- og ungmennafélög geta, að uppfylltum skilyrðum, skráð sig á slíka skrá. Gild skráning er skilyrði fyrir því að einstaklingar og fyrirtæki geti nýtt sér frádrátt vegna slíkra framlaga. Frádrátturinn hjá einstaklingum getur numið frá 10 til 350 þúsund króna á ári og hjá fyrirtækjum allt að 1,5% af rekstrartekjum.
Endurgreiðsla vegna íþróttamannvirkja?
Þá spurði Hulda jafnframt um það hvaða aðgerðir ríkisstjórnin hyggist ráðast í vegna endurgreiðslu og/eða stuðnings við uppbyggingu mannvirkja til íþróttaiðkunar.
Í svari ráðherra segir að fjallað sé um skiptingu ábyrgðar á uppbyggingu mannvirkja til íþróttaiðkunar milli ríkis og sveitarfélaga í íþróttalögum og reglugerð um viðurkenningu þjóðarleikvanga í íþróttum. Í 7. gr. íþróttalaga segi að bygging íþróttamannvirkja í þágu skóla og til almenningsnota sé í verkahring sveitarfélaga nema öðruvísi sé fyrir mælt í lögum. Í reglugerð um viðurkenningu þjóðarleikvanga í íþróttum er fjallað um framlag ríkis til stofnkostnaðar þjóðarleikvanga.
Ríkið, í samstarfi við Reykjavíkurborg, komi að uppbyggingu þjóðarhallar fyrir inniíþróttir og að uppbyggingu þjóðarleikvanga fyrir knattspyrnu og frjálsíþróttir. Verkefnin eru mislangt á veg komin en öll munu þau skapa bætta umgjörð til alþjóðlegs keppnishalds hér á landi og aukin tækifæri til að efla faglega umgjörð með keppnisíþróttastarfi, að því er segir í svarinu.
Að lokum spurði Hulda um það hvaða endurgreiðslur og/eða styrkir lýðheilsuverkefnum standi til boða í dag? Ef ekki, hvers vegna?
Í svarinu er bent á að endurgreiðslur og/eða styrkir til lýðheilsuverkefna heyra ekki undir mennta- og barnamálaráðuneytið enda fari heilbrigðisráðuneytið með mál sem varða lýðheilsu og forvarnir.
Svar við spurningum Huldu til ráðherra má sjá hér:
Fjárframlög og ívilnanir til íþrótta- og æskulýðsstarfs