Sambandsþing UMFÍ sett í dag
Sambandsþing UMFÍ hefst í dag í Stykkishólmi og stendur þar yfir um helgina. Þingið er æðsta vald í málefnum UMFÍ og er það haldið annað hvert ár. Þingið nú er á margan hátt sögulegt. Eftir að Íþróttabandalag Vestmannaeyja (ÍBV) varð sambandsaðili UMFÍ nú í vor eru fulltrúar frá öllum íþróttahéruðum landsins á þinginu í fyrsta sinn.
UMFÍ hefur stækkað mikið í gegnum árin. Það birtist í fleiri tillögum fyrir þinginu en áður hefur sést. Þá birtist fjölgun í UMFÍ í fjölda gesta við setningu sambandsþingsins á Fosshóteli í Stykkishólmi síðdegis í dag. Reiknað er með 160 manns við setninguna, þingfulltrúum og öðrum gestum.
Margt verður fjallað um á þinginu. Meðal annars verður stjórnarkjör. Jóhann Steinar Ingimundarson, formaður UMFÍ, var einn í framboði til formanns og verður hann því sjálfkjörinn.
Kosið í stjórn
Ljóst er að nokkur endurnýjun verður í stjórninni því ellefu eru í framboði til setu í stjórn og enn sem komið tveir í framboði til varastjórnar. Að loknu kjöri til stjórnar geta þau sem ekki ná kjöri í stjórn tekið ákvörðun um að bjóða sig fram til setu í varastjórn.
Stjórn UMFÍ er skipuð sjö einstaklingum: Formanni, varaformanni, gjaldkera, ritara og þrem meðstjórnendum.
Varastjórn er skipuð fjórum fulltrúum og ræður atkvæðafjöldi þeirra í kosningu röð þeirra.
Frambjóðendur munu kynna sig á Sambandsþingi UMFÍ og fá til þess þrjár mínútur hver.
Gengið verður til kosninga síðdegis á laugardag, 11. október næstkomandi.
Í framboði eru eftirfarandi:
Til formanns UMFÍ:
Jóhann Steinar Ingimundarson - Ungmennasambandi Kjalarnesþings (UMSK).
Til aðalstjórnar UMFÍ:
- Birgir Már Bragason – Íþróttabandalag Reykjanesbæjar (ÍRB).
- Guðmundur Sigurbergsson – Ungmennasamband Kjalarnesþings (UMSK).
- Guðný Stefanía Stefánsdóttir – Héraðssamband Vestfjarða (HSV).
- Gunnar Gunnarsson – Ungmenna- og íþróttasamband Austurlands (UÍA).
- Halla Margrét Jónsdóttir – Íþróttabandalag Akraness (ÍA).
- Helgi Sigurður Haraldsson – Héraðssambandið Skarphéðinn (HSK).
- Margrét Sif Hafsteinsdóttir – Íþróttabandalag Reykjavíkur (ÍBR).
- Ragnheiður Högnadóttir – Ungmennasamband Vestur-Skaftafellssýslu (USVS).
- Sigurður Eyjólfur Sigurjónsson – Ungmennasamband Vestur-Skaftafellssýslu (USVS).
- Sigurður Óskar Jónsson – Ungmennasambandið Úlfljótur (USÚ).
- Skúli Bragi Geirdal – Íþróttabandalag Akureyrar (ÍBA).
Til varastjórnar UMFÍ:
- Ásgeir Sveinsson – Héraðssambandið Hrafna-Flóki (HHF).
- Gunnar Þór Gestsson – Ungmennasamband Skagafjarðar (UMSS).
Hægt er að kynna sér þingið í þaula á vefsíðu Sambandsþings UMFÍ 2025.